Həkimlər xəbərdarlıq edirlər ki, isti havada hətta az miqdarda spirtli içki qəbul etmək belə orqanizmdə susuzlaşma, başgicəllənmə və huşun itirilməsi riskini artırır.
Lent.az xarici mətbuata istinadən xəbər verir ki, yüksək temperatur zamanı orqanizm tərləmə vasitəsilə soyuyur və bunun nəticəsində sürətlə su və minerallar itirir. Spirtli içkilər isə sidikqovucu təsir göstərdiyi üçün bu prosesi daha da gücləndirir və orqanizmdə maye itkisini artırır. Bundan əlavə, alkoqol qan damarlarını genişləndirir.
Bu səbəbdən insan qısa müddət ərzində özünü sərinləşmiş kimi hiss edə bilər. Lakin əslində bu, orqanizmin təbii istilik tənzimləmə mexanizmini pozur və həddindən artıq qızma riskini artırır.
Mütəxəssislərin sözlərinə görə, günəş altında uzun müddət qalan, kifayət qədər su içməyən və ya fiziki fəaliyyətlə məşğul olan insanlar üçün hətta bir bakal pivə, şərab və ya kokteyl belə sağlamlığa mənfi təsir göstərə bilər.
Kimlər daha diqqətli olmalıdır?
Həkimlər bildirirlər ki, yaşlı insanlar, hamilə qadınlar, ürək-damar və böyrək xəstəliklərindən əziyyət çəkən şəxslər, həmçinin arterial təzyiqi salan və ya sidikqovucu dərman qəbul edənlər isti havada spirtli içkilərdən xüsusilə ehtiyatla istifadə etməlidirlər.
Hansı əlamətlər təhlükədən xəbər verir?
Mütəxəssislər güclü susuzluq, baş ağrısı, başgicəllənmə, halsızlıq, ürəkbulanma, ürək döyüntüsünün sürətlənməsi və ya şüurun qarışması kimi əlamətlər yarandıqda dərhal spirtli içki qəbulunu dayandırmağı və sərin yerə keçməyi tövsiyə edirlər. Ağır hallarda huşun itirilməsi və istilik tükənməsi baş verə bilər ki, bu da təcili tibbi yardım tələb edir.
İsti günlərdə nə etmək tövsiyə olunur?
Həkimlər isti havalarda spirtli içkilərin qəbulunu mümkün qədər məhdudlaşdırmağı, hətta imkan daxilində tamamilə imtina etməyi məsləhət görürlər. Əgər spirtli içki qəbulundan qaçmaq mümkün deyilsə, kifayət qədər su içmək, alkoqolu acqarına qəbul etməmək, kölgədə qalmaq və uzun müddət birbaşa günəş şüaları altında olmamaq tövsiyə edilir.
Mütəxəssislərin fikrincə, isti havalarda sağlamlığı qorumağın ən yaxşı yolu ölçülü davranmaq, kifayət qədər maye qəbul etmək və orqanizmin verdiyi siqnallara diqqət yetirməkdir.
Qeyd edək ki, həkimlər antidepresantlarla spirtli içkilərin birlikdə qəbulunu da təhlükəli hesab edirlər. Alkoqol müalicənin effektivliyini azaldır, çünki depressant təsir göstərərək beynin kimyəvi balansını pozur. Bundan əlavə, REM yuxu fazasını zəiflədərək yuxunun keyfiyyətini aşağı salır.
Həkim Devid Strim müalicənin ilk 4-6 həftəsində spirtli içkilərdən tamamilə imtina etməyi, sonrakı dövrdə isə onları yalnız çox nadir hallarda qəbul etməyi tövsiyə edir.
Sağlıq isti hava spirtli içkiMənbə: lent.az