Yaş artdıqca bir çox qadın əvvəlki kimi rahat və dərin yata bilmədiyini hiss edir. Mütəxəssislərin sözlərinə görə, bu dəyişikliklər hormonal proseslər, orqanizmin yaşlanması və həyat tərzindəki fərqlərlə bağlıdır. Bununla belə, gündəlik vərdişlərdə edilən kiçik dəyişikliklər yuxunun keyfiyyətini əhəmiyyətli dərəcədə yaxşılaşdıra bilər.
Lent.az xarici KİV-ə istinadən xəbər verir ki, Holisitik tibb üzrə həkim Taz Bhatia 50 yaşdan yuxarı qadınlar üçün daha rahat yatmağa kömək edən üsulları açıqlayıb.
Əvvəlcə həkim müayinəsindən keçin
Həkim bildirib ki, yuxu problemləri davamlı xarakter alıbsa, ilk növbədə mütəxəssisə müraciət etmək vacibdir. Onun sözlərinə görə, yüksək səslə xoruldamaq, gün ərzində daim yorğunluq və yuxululuq hiss etmək yuxu apnesinin əlaməti ola bilər.
Bu zaman yuxu zamanı nəfəs müvəqqəti dayanır və yenidən bərpa olunur. Nəticədə insan tez-tez dərin yuxudan oyanır, bu isə ürək, ağciyər və beyin üçün əlavə yük yaradır. Belə hallarda CPAP cihazı hava axınını yaxşılaşdıraraq yuxu apnesinin müalicəsində effektiv vasitələrdən biri hesab olunur.
Omeqa-3 yuxunu yaxşılaşdıra bilər
Mütəxəssisin sözlərinə görə, gün ərzində qəbul edilən qidalar gecə yuxusuna ciddi təsir göstərir. Omeqa-3 yağ turşuları iltihabı azaltmağa, nəfəs yollarını açmağa və yuxuya mane olan ağrıları yüngülləşdirməyə kömək edə bilər. Həkim həftə ərzində bir neçə dəfə qızılbalıq yeməyi, həmçinin yulaf sıyığına, yoqurda və ya smuziyə hər gün kətan və ya çia toxumu əlavə etməyi tövsiyə edir. Bununla yanaşı, yatmazdan qısa müddət əvvəl ağır yeməklərdən uzaq durmaq məsləhət görülür.
Araşdırmalar keyfiyyətli balıq yağı əlavələrinin də böyüklərdə daha tez yuxuya getməyə və daha dərin yatmağa kömək edə biləcəyini göstərir. Lakin hər hansı qida əlavəsini qəbul etməzdən əvvəl həkimlə məsləhətləşmək vacibdir.
L-teanin sakitləşdirici təsir göstərə bilər
Əgər yuxusuzluğun əsas səbəbi narahatlıq və ya fikirlərin çox olmasıdırsa, L-teanin faydalı ola bilər. Bu amin turşusu matça çayında olur və gündüz yuxululuq yaratmadan sakitlik hissini artırmağa kömək edir.
Həkim səhərlər smuziyə matça tozu əlavə etməyi və ya günorta saatlarında az şəkərli matça latte içməyi tövsiyə edir. Eyni zamanda, günortadan sonra tərkibində kofein olan içkilərin qəbulunu məhdudlaşdırmaq məsləhətdir.
Maqnezium yuxunun keyfiyyətini artıra bilər
Taz Bhatianın sözlərinə görə, maqnezium sinirləri sakitləşdirir və əzələlərin boşalmasına kömək edir. Bu isə daha dərin və rahat yuxuya şərait yaradır. O bildirib ki, maqneziumun bütün formaları eyni təsirə malik deyil. Daha yaxşı mənimsənildiyi üçün maqnezium bisqlisinat formasına üstünlük vermək tövsiyə olunur.
Yuxusuzluğu adi hal kimi qəbul etməyin
Mütəxəssis vurğulayır ki, orta yaş dövründə yuxuda dəyişikliklərin baş verməsi normal sayılsa da, bunu qaçılmaz hal kimi qəbul etmək düzgün deyil. Həkim müayinəsi, düzgün qidalanma, sakitləşdirici içkilər və lazım gəldikdə uyğun qida əlavələri yuxunun keyfiyyətini yaxşılaşdırmağa kömək edə bilər. Bununla belə, hər hansı əlavəni və ya müalicə üsulunu tətbiq etməzdən əvvəl mütləq həkimlə məsləhətləşmək tövsiyə olunur.
Sağlıq yuxusuzluq 50 yaşdan sonra qadın sağlamlığı yuxuMənbə: lent.az