Mütəxəssislər bildirirlər ki, kartofdan tamamilə imtina etməyə ehtiyac yoxdur, lakin yüksək qan təzyiqindən əziyyət çəkən insanlar onun qəbulunu məhdudlaşdırmalıdır.
Lent.az xəbər verir ki, britaniyalı dietoloq Sarah Brever yüksək arterial təzyiqi olan şəxslərə qida rasionundakı kartof miqdarını yenidən nəzərdən keçirməyi və həftədə təxminən dörd porsiyadan artıq istifadə etməməyi tövsiyə edib. Mütəxəssis bu fikrini Harvard Medical School tərəfindən aparılan araşdırmanın nəticələri ilə əsaslandırıb.
Araşdırmada 187 mindən çox kişi və qadının məlumatları təhlil olunub. Alimlər müxtəlif formada kartof qəbul edən insanlarla onu daha az yeyən şəxsləri müqayisə ediblər. Nəticədə məlum olub ki, kartofu tez-tez yeyən insanlarda hipertoniya riski təxminən 11 faiz daha yüksəkdir. Sarah Breverin sözlərinə görə, həftədə dörd və ya daha çox porsiya kartof yemək, xüsusilə artıq çəki və az hərəkətli həyat tərzi kimi risk faktorları ilə birlikdə olduqda, qan təzyiqinin yüksəlməsi ehtimalını artırır.
Ekspertlər qeyd edirlər ki, kartof, xüsusilə bişirildikdən sonra yüksək qlisemik indeksə malik olur. Bu isə qanda şəkərin sürətlə yüksəlməsinə səbəb ola bilər. Uzunmüddətli dövrdə belə qidalanma maddələr mübadiləsinə, insulinə həssaslığa və damarların vəziyyətinə mənfi təsir göstərə bilər. Xüsusilə yağda qızardılmış və çox duz əlavə olunmuş kartof yeməkləri daha riskli hesab edilir.
Həkimlərin sözlərinə görə, hipertoniya çox vaxt gizli inkişaf edir və təsadüfi olaraq “səssiz qatil” adlandırılmır. Xəstəliyin ilkin mərhələlərində ciddi simptomlar görünməsə də, zamanla infarkt, insult və böyrək problemləri riskini artırır. Daha ağır hallarda baş ağrısı, sinədə döyünmə hissi, nəfəs darlığı, görmə pozuntuları və hətta sidikdə qan müşahidə oluna bilər.
Mütəxəssislər vurğulayırlar ki, qan təzyiqinə yalnız qidalanma deyil, ümumi həyat tərzi də ciddi təsir edir. Həddindən artıq duz qəbulu, stress, yuxusuzluq və fiziki aktivliyin az olması hipertoniya riskini yüksəldir. Əvəzində aşağı qlisemik indeksə malik tərəvəzlər, tam taxıllar, paxlalılar və faydalı yağlarla zəngin qidalanma qan təzyiqinin sabit qalmasına kömək edir.
Həkimlər xüsusilə 40 yaşdan yuxarı insanlara özlərini yaxşı hiss etsələr belə, arterial təzyiqlərini mütəmadi yoxlamağı tövsiyə edirlər. Çünki yüksək göstəricilərin erkən aşkar olunması vaxtında düzgün qidalanma və həyat tərzi dəyişiklikləri etməyə imkan verir.
Sağlıq kartof kartof kimlərə olmazMənbə: lent.az