Davamlı İnkişaf Məqsədlərinin (SDG) lokallaşdırılması və mərkəzsizləşdirmənin inkişafı BMT-nin fəal dəstəyi ilə həyata keçirilən Tailandın dövlət siyasətinin əsas istiqamətlərinə çevrilib.
"Report" xəbər verir ki, bu barədə BMT-nin Tailanddakı daimi əlaqələndiricisi Mikaela Friberq-Stori Bakıda Ümumdünya Şəhərsalma Forumunun 13-cü sessiyası (WUF13) çərçivəsində keçirilən panel müzakirəsi zamanı bildirib.
O, həm ümumdövlət, həm də bələdiyyə səviyyələrində siyasi dəstəyin vacibliyini vurğulayıb. Nümayəndə misal olaraq qeyd edib ki, BMT-nin Tailanddakı nümayəndəliyi hökumətlə birgə SDG-lərə nail olmaq üzrə öhdəliklər imzalayan ölkə qubernatorlarını bir platformada bir araya gətirə bilib və bu da gündəliyin gələcək lokallaşdırılması üçün əsas olub.
Mikaela Friberq-Stori həmçinin qeyd edib ki, Tailandın yeni hökuməti idarəetmənin mərkəzsizləşdirilməsi və dayanıqlı inkişafın lokallaşdırılması kursunu milli prioritet kimi təsbit edib.
"Biz bütün səviyyələrdə: milli, regional və bələdiyyə səviyyələrində siyasi iradəni dəstəkləməliyik", - o deyib.
Mənbə: report.az