Gürcüstan vahid dövlət mənzil siyasətinin formalaşdırılmasına yönəlmiş genişmiqyaslı islahatların həyata keçirilməsini hədəfləyir.
"Report" xəbər verir ki, bunu Gürcüstanın Məkan və Şəhərsalma İnkişafı Agentliyinin (SUDA) rəhbərinin birinci müavini Tinatin Kolbaya Bakıda Ümumdünya Şəhərsalma Forumunun 13-cü sessiyası (WUF13) çərçivəsində keçirilən tədbirdə bildirib.
Onun sözlərinə görə, hazırda Gürcüstanda vətəndaşların mənzillə təmin edilməsi məsələləri ciddi şəkildə fraqmentləşmiş olaraq qalır və müxtəlif aidiyyəti idarələrin, eləcə də dövlət strukturlarının səlahiyyətindədir.
"Bizdə mənzil sahəsini tam əhatə edəcək vahid çərçivə qanunvericiliyi yoxdur", - T.Kolbaya qeyd edib.
O vurğulayıb ki, UN-Habitat-ın dəstəyi ilə 2024-cü ildə Gürcüstanın Milli Şəhər Forumu tamamilə mənzil mövzusuna həsr olunmuşdu: "Bundan sonra ekspert Vladimir Mardosani tərəfindən hazırlanan mənzil siyasəti üzrə "Ağ kitab"ın əsas müddəaları işlənib hazırlanıb".
T.Kolbaya əlavə edib ki, hazırda mənzil sektorunun inkişafına dair əsas məsələlər artıq ölkənin Milli Məkan Planının ümumi konsepsiyasına inteqrasiya edilib.
Mənbə: report.az