İtaliya və "UN-Habitat" Dayanıqlı İnkişaf Məqsədlərinin (DİM) lokallaşdırılması üzrə yeni platforma yaradıb.
"Report" xəbər verir ki, bunu İtaliyanın Azərbaycandakı səfiri Luka di Canfrançesko Ümumdünya Şəhərsalma Forumunun 13-cü sessiyası (WUF13) çərçivəsində "Milli DİM-lərin Lokallaşdırılması Çərçivələri" mövzusunda keçirilən tədbirdə deyib.
O, İtaliya və "UN-Habitat" tərəfindən idarəetmə mexanizmlərinin təkmilləşdirilməsi məqsədilə yeni qlobal təşəbbüsün əsasının qoyulduğunu bildirib: "DİM-ləri yerli səviyyəyə uyğunlaşdırmaq qlobal hədəflər üçün böyük əhəmiyyət kəsb edir. Məhz buna görə də, çoxsəviyyəli idarəetmənin əsas rolunu, DİM-lərin yerli səviyyəyə uyğunlaşdırılmasını, 2030 Gündəliyinin və Yeni Urbanist Gündəliyinin sütunları kimi davamlı inkişaf üçün siyasətin uyğunluğunu konkret şəkildə qəbul edərək, birgə öhdəliyi gücləndirmək böyük əhəmiyyət kəsb edir. Bu fonda İtaliya və UN-Habitat, həmçinin İtaliya hökumətinin Afrika ilə "Mattei Planı" tərəfdaşlığı çərçivəsində, DİM-lərin yerli səviyyədə tətbiqi üzrə Tərəfdaşlıq Platformasını işə salıblar. Bunun məqsədi sistemli transformasiyanın hərəkətverici qüvvəsi kimi DİM-lərin lokallaşdırılmasının mərkəzi roluna töhfə verməkdir".
Səfir beynəlxalq tərəfdaşlığın genişləndirilməsi hədəflərinə toxunub: "Bu gün bu paneldə Seneqaldan, eləcə də digər tərəfdaş ölkələrdən və təşkilatlardan olan natiqləri salamlamaqdan xüsusi məmnunluq duyuram. UN-Habitat-ın liderliyi, Tərəfdaşlıq Platforması və digər təşəbbüslər sayəsində biz həmçinin WUF13-ün toxunduğu mühüm mövzular üzrə beynəlxalq əməkdaşlığı gücləndirmək məqsədini bölüşürük. Həqiqətən də, biz tam əminik ki, İtaliya Konstitusiyasının əsas prinsiplərindən biri olan çoxtərəflilik, təcrübə mübadiləsi aparmaq, faydalı göstəricilər və dərslər çıxarmaq üçün vacib olaraq qalır. Bu, yerli səviyyədən gələn təcrübələrə hörmətlə yanaşmaq və onları dəstəkləməklə yanaşı, getdikcə daha ardıcıl qlobal yanaşmanı təşviq etmək üçün əsasdır".
Mənbə: report.az