Çinin Şəhərsalma Planlaşdırması Cəmiyyəti (UPSC) urbanistika sahəsində Azərbaycanla əməkdaşlığın inkişafında və qlobal çağırışlara birgə həll yollarının tapılmasında maraqlıdır.
Bunu "Report"a açıqlamasında UPSC-nin icraçı vitse-prezidenti və baş katibi Şi Nan Bakıda keçirilən Ümumdünya Şəhərsalma Forumunun 13-cü sessiyası (WUF13) çərçivəsində bildirib.
Onun sözlərinə görə, assosiasiya Azərbaycan tərəfi ilə əlaqələr qurmaq və beynəlxalq əməkdaşlığı genişləndirmək məqsədilə forumda iştirak edir.
"Biz yerli və beynəlxalq iştirakçılarla, potensial tərəfdaşlarla əməkdaşlıq qurmaq istəyirik. Bu günün çağırışları qlobal problemlər: iqlim dəyişikliyi, sosial seqreqasiya və resurs məhdudiyyətləri ilə bağlıdır. Ölkələr bu məsələləri tək başına həll edə bilməzlər, buna görə də birlikdə işləmək lazımdır", - o qeyd edib.
Şi Nan həmçinin vurğulayıb ki, bu, onun Bakıya ilk səfəridir, lakin Azərbaycan paytaxtı onda güclü təəssürat bağışlayıb.
"İlk dəfədir Bakıdayam. Amma burada baş verənlər məni həqiqətən heyran edib. Bu, mənə Çindəki prosesləri xatırladır. Ortaq cəhətlərimiz çoxdur: oxşar inkişaf mərhələsi və idarəetmə sistemi. Bundan başqa, bənzər çağırışlarla da üzləşirik", - o deyib.
UPSC-nin baş katibinin sözlərinə görə, Çin nümayəndə heyəti WUF13-də təşkilatın yeddi institusional üzvünün – Çinin şəhərsalma sahəsində aparıcı şirkət və institutlarının iştirakı ilə sərgi təqdim edib.
O qeyd edib ki, təqdim olunan layihələr təkcə Azərbaycanla iş təcrübəsini deyil, həm də Çinin sürətli urbanizasiya şəraitində ümumi yolunu, o cümlədən dövlət orqanları ilə qarşılıqlı əlaqəni, planlaşdırma, maliyyələşdirmə, eləcə də infrastruktur və mənzil inkişafı məsələlərini əks etdirir.