Kiribati milli və yerli hakimiyyət orqanlarının potensialının gücləndirilməsi üçün investisiyalar yatırmağa çağırır.
"Report" xəbər verir ki, bunu Kiribatinin mədəniyyət və daxili işlər naziri Harri Tekaiti Bakıda Ümumdünya Şəhərsalma Forumunun 13-cü sessiyasında (WUF13) nazirlərin dəyirmi masasında bildirib.
O qeyd edib ki, Kiribati üçün əsas maneələr: məhdud texniki imkanlar, maliyyə resurslarının çatışmazlığı və maliyyələşdirməyə çıxış əldə etmək üçün layihələrin hazırlanmasının daha səmərəli mexanizmlərinə olan ehtiyacdır.
"Bununla əlaqədar, qarşıdan gələn onillik öz səmərəliliyini artıq sübut etmiş yanaşmaların miqyasının genişləndirilməsinə yönəldilməlidir. Birincisi, Kiribati, şəhər şuralarının dayanıqlı mənzil həllərini hazırlayıb həyata keçirə bilməsi üçün milli və yerli hakimiyyət orqanlarının imkanlarının gücləndirilməsinə vəsait yatırmağa çağırır. İkincisi, iqlim və şəhər prioritetlərinin uzlaşdırılmasını və ardıcıl həyata keçirilməsini təmin edən milli və yerli idarəetmə sistemlərinin dərin inteqrasiyası zəruridir. Üçüncüsü, şəhər layihələri hazırlanması və icrası sahəsində ünvanlı dəstək tələb olunur, bu da bizim kimi dövlətlərə iqlim maliyyələşdirməsinin və inkişaf məqsədləri üçün vəsaitlərin cəlb edilməsinə və səmərəli istifadəsinə kömək etmək imkanı verəcək. Planlarımız kifayət qədərdir. Onların geniş miqyasda həyata keçirilməsi üçün bizə resurslar lazımdır", - nazir vurğulayıb.