Jurnalist Nicole Clancy bir həftə ərzində hər gün 30 dəqiqə tam səssizlikdə qalaraq şəxsi eksperiment aparıb. Nəticələr göstərib ki, hətta qısa müddətli səssizlik seansları belə stress hormonu olan kortizolun səviyyəsini azaltmağa, yuxunu yaxşılaşdırmağa və narahatlığı aradan qaldırmağa kömək edir.
Lent.az xarici mediaya istinadla xəbər verir ki, eksperimentin ideyası Nikolin dostları ilə keçirdiyi adi bir şam yeməyində yaranıb. Onun bir neçə rəfiqəsi müasir həyatın xaosundan uzaqlaşmaq üçün mütəmadi olaraq səssizlik günləri keçirdiklərini bildirib. Bu fikirdən ilhamlanan jurnalist qərara alıb ki, 7 gün ərzində hər gün 30 dəqiqə heç bir səs və diqqət yayındırıcı olmadan vaxt keçirsin evdə və ya avtomobildə.
Mütəxəssislər bu yanaşmanın faydasını təsdiqləyir. Psixi sağlamlıq üzrə ekspert Sarah Pace qeyd edir ki, səssizlik retreatləri bədən və zehni yenidən yükləməyə kömək edir. 2024-cü ilə aid elmi araşdırmalar da göstərir ki, bu cür praktikalar maddələr mübadiləsini yaxşılaşdırır və orqanizmdə iltihabi prosesləri azaldır.
Lakin bu təcrübəni tətbiq etmək asan olmayıb. Nikole sıx qrafikində bu 30 dəqiqəni tapmaq üçün ciddi səy göstərib. Həftənin dörd günü o, avtomobilində radio və telefon olmadan səssiz mühitdə oturub, digər günlər isə bağda vaxt keçirib. Başlanğıcda o, heç nə etmədiyi üçün günahkarlıq hissi keçirib və fikirləri davamlı olaraq gündəlik işlərə yönəlib.
Psixoterapevt Cennifer Teplin bunu normal hal kimi izah edir: insan xarici stimullardan uzaqlaşanda beyin mübarizə və ya qaçış rejimindən çıxaraq sakitləşməyə başlayır.
Həftənin ortalarından etibarən isə vəziyyət dəyişib. Nikole bu 30 dəqiqənin onun üçün xüsusi bir rahatlıq anına çevrildiyini hiss edib. O, klassik meditasiya etməyib, sadəcə fikirlərini sərbəst buraxaraq buludlara və ağaclara baxmaqla anı yaşayıb.
Həftənin sonunda əldə olunan nəticələr olduqca təsirli olub. Jurnalist daha az əsəbiləşdiyini, əhval-ruhiyyəsinin stabilləşdiyini və yuxusunun daha dərin olduğunu bildirib.
səssizlik səssizliyin sağlamlığa təsiri