İspaniyanın cənubunda yerləşən Friqiliana kəndi dünyanın ən gözəl məkanlarından biri adlandırılıb. Sakit atmosferi, ağ rəngli evləri və möhtəşəm təbiəti ilə seçilən bu məkan son dövrlər turistlərin diqqət mərkəzinə çevrilib.
Lent.az bu barədə xarici mediaya istinadla xəbər verir.
Friqiliana, Malaqa bölgəsində, Sierra-Almijara dağ silsiləsinin ətəyində və məşhur Costa del Sol sahillərinə yaxın ərazidə yerləşir.
Kənd əsasən rəngarəng güllərlə bəzədilmiş ağ evləri ilə tanınır. Dar və dolama küçələr isə turistlərə Aralıq dənizinin valehedici mənzərəsini təqdim edir. Bu xüsusiyyətlər Friqiliananı sosial şəbəkələrdə foto çəkdirmək istəyən turistlərin sevimli məkanına çevirib.
Məqalədə qeyd olunur ki, kəndin möhtəşəm təbiəti macəra və kəşf etməyi sevən insanlar üçün ideal şərait yaradır. Burada şam meşələri, qayalı dağlar və yaşıl vadilər boyunca uzanan mənzərəli yürüş marşrutları mövcuddur.
Friqiliana həmçinin bir neçə məşhur çimərliyə də yaxın yerləşir. Onlardan biri Burriana Beach çimərliyidir. Qızılı qumlu sahili ilə tanınan bu məkanda turistlər günəş vannası qəbul edə, şəffaf suda üzə, həmçinin snorkel, kayak və SUP-sörfinq kimi su idman növlərini sınaya bilərlər.
Ən gözəl çimərliklərdən biri hesab edilən Maro Beach isə hündür qayalar arasında yerləşir və firuzəyi rəngli suyu ilə məşhurdur.
Yaxınlıqda yerləşən Nerja şəhəri də turistlərin böyük marağına səbəb olur. Burada yerləşən məşhur müşahidə meydançasından Aralıq dənizinə açılan möhtəşəm mənzərələri izləmək mümkündür.
Tarix həvəskarları üçün də Friqilianada maraqlı məkanlar kifayət qədərdir. Yaxşı qorunub saxlanılmış tarixi məhəllə İspaniya hökuməti tərəfindən mədəni irs obyekti elan olunub. Turistlər burada orta əsr qalasını ziyarət edə, Andalusiya memarlığının gözəlliyini yaxından görə bilərlər.
Kənddə və ətraf bölgələrdə çoxsaylı restoran və tapas barları fəaliyyət göstərir. Burada qonaqlara kokteyllər, yerli şərablar və müxtəlif qəlyanaltılar təqdim olunur. Əgər səfər uyğun tarixə təsadüf etsə, turistlər açıq hava konsertləri, musiqi çıxışları, sərgilər və ənənəvi festivallarda da iştirak edə bilərlər.
Friqilianaya ən yaxın hava limanı Malaga Airport hesab olunur. Hava limanından kəndə avtomobil, taksi və ya avtobusla təxminən bir saata çatmaq mümkündür.
İspaniya ən gözəl kənd dünyanın ən gözəl yeri