Uçuş reysinin ləğv edilməsi sərnişinlər üçün stress və narahatlıq yaratsa da, aviaşirkətlərin bu zaman konkret öhdəlikləri mövcuddur. Böyük Britaniya qaydalarına görə, səbəbindən asılı olmayaraq istər pis hava şəraiti, texniki nasazlıq, istərsə də müharibə və ya vulkan püskürməsi zamanıaviaşirkətlər sərnişinlərə qayğı göstərməlidir.
Lent.az xarici mediaya istinadla xəbər verir ki, aviaşirkətlər sərnişinlər üçün gözləmə müddətində əsas ehtiyacları təmin etməlidir.
Qida və içki: Gecikmə zamanı sərnişinlərə yemək və içkilər təqdim olunmalıdır. Bu adətən hava limanında istifadə üçün vauçer formasında olur. Əgər avtomatik verilməzsə, sərnişinlər şirkət nümayəndələrinə müraciət edə bilər.
Yaşayış (otel): Əgər gecikmə gecəni əhatə edirsə, aviaşirkət otel təmin etməlidir. Bəzən rezervasiya birbaşa şirkət tərəfindən edilir, bəzi hallarda isə sərnişin özü sifariş verib sonradan pulunu geri ala bilər.
Nəqliyyat: Hava limanı ilə otel arasında nəqliyyat xərcləri də qarşılanmalıdır. Əgər sərnişin yaxınlıqda yaşayırsa, evə gedib-gəlmə xərcləri də kompensasiya edilə bilər.
Əgər xidmət göstərilməzsə nə etməli?
Əgər aviaşirkət bu xidmətləri təqdim etməzsə, sərnişinlər özləri təşkil edib sonradan kompensasiya tələb edə bilərlər. Bunun üçün bütün qəbzləri saxlamaq vacibdir. Lakin xərclər “məqbul” olmalıdır. Bahalı otellər, lüks yeməklər və ya spirtli içkilər adətən ödənilmir.
Pul kompensasiyası nə vaxt verilir?
Əgər sərnişin təyinat nöqtəsinə 3 saatdan çox gec çatarsa, əlavə pul kompensasiyası tələb edə bilər. Bu məbləğ uçuş məsafəsindən asılı olaraq təxminən 220 funt sterlinqdən 520 funta qədər dəyişir. Lakin “fövqəladə hallar” (məsələn, hava şəraiti və ya müharibə) zamanı aviaşirkətlər bu ödənişdən azad olunur.
Reysdən imtina hüququ
Əgər gecikmə 5 saatdan çox davam edərsə, sərnişin səfərdən imtina edib bilet pulunu tam geri ala bilər. Eyni bilet daxilində transfer edən sərnişinlər son təyinat nöqtəsinə qədər qorunur. Ayrı-ayrı biletlərlə səyahət edənlər isə bu hüquqlardan tam istifadə edə bilməyə bilər.
Uçuş zamanı maraqlı məsləhət
Stüardessalar uçuş zamanı dietik kola sifariş etməyi məsləhət görmür. Səbəb isə kabinədə təzyiqin aşağı olmasıdır. Bu halda qazlı içkilər, xüsusilə dietik kola, daha çox köpüklənir və xidmət prosesini ləngidir.
uçuş aviaşirkət uçuşun ləğvi