Müasir tədqiqatlar göstərir ki, insanın nə vaxt yaşlı hesab olunması artıq yalnız təvəllüdü ilə müəyyən edilmir. Alimlərin gəldiyi yeni nəticələr bu anlayışın cəmiyyətə görə dəyişdiyini ortaya qoyur.
Lent.az xarici mediaya istinadla xəbər verir ki, 2000-dən çox insanın iştirak etdiyi sorğuda respondentlər orta hesabla 69 yaşdan sonra insanı yaşlı hesab etdiklərini bildiriblər.
Araşdırmanın nəticələri göstərir ki, bu yanaşma əvvəlki illərlə müqayisədə dəyişib. Belə ki, daha əvvəl aparılan tədqiqatlarda qocalığın 62 yaşdan başladığı qeyd olunurdu. Yeni məlumatlar isə insanların yaşa baxışının tədricən dəyişdiyini sübut edir.
Maraqlıdır ki, bu yaş həddi bir çox tanınmış simaları da əhatə edir. Məsələn, Tom Hanks, Kim Cattrall və Steve Harvey kimi məşhurlar da artıq bu kateqoriyaya daxil edilir.
Mütəxəssislər bildirirlər ki, qocalıq anlayışı nəsillər arasında fərqli qəbul olunur. “Baby boomer” nəslinə aid şəxslər (1946–1964-cü illərdə doğulanlar) qocalığın təxminən 67 yaşda başladığını düşünürlər. Lakin daha gənc nəsillər bu mərhələnin daha erkən başladığını hesab edir.
Digər araşdırmalar göstərir ki, Z nəsli idrak zəifləməsinin orta hesabla 62 yaşdan başladığını düşünür. Texnologiyalara uyğunlaşmaqda çətinliklərin isə təxminən 59 yaşda hiss olunduğu qeyd olunur.
Alimlər beynin inkişaf mərhələlərini də müəyyənləşdiriblər. Bu bölgüyə əsasən, 66–83 yaş aralığı erkən qocalıq, 83 yaşdan sonrakı dövr isə gec qocalıq mərhələsi kimi qiymətləndirilir.
Mütəxəssislər vurğulayır ki, qocalıq yalnız bioloji deyil, həm də psixoloji və sosial anlayışdır. İnsanların həyat tərzi, düşüncə forması və aktivliyi bu prosesə ciddi təsir göstərir. Buna görə də “yaşlılıq” anlayışı getdikcə daha fərdi xarakter daşıyır.
qocalıq ömür qocalıq yaşı