"Super Mario: The Galaxy Movie" animasiya filmi ötən həftəsonu ABŞ və Kanada kassalarında 35 milyon dollar gəlir əldə edərək birinci pillədə qərarlaşdı.
Lent.az xarici mediaya istinadla xəbər verir ki, “Universal” və “Illumination” studiyalarının istehsalı olan bu ekran işi Şimali Amerika prokatında ardıcıl olaraq üçüncü həftədir ki, liderliyini qoruyub saxlayır.
Məlumatlara görə, bu son gəlirlə birlikdə filmin ABŞ və Kanadadakı ümumi qazancı 355,2 milyon dollara yüksəlib. Dünya miqyasında isə ümumi gəlir 750 milyon dollara (747,5 milyon dollar) yaxınlaşır. Sahə üzrə ekspertlər bu davam filminin ümumi gəlirinin 1 milyard dolları keçəcəyini proqnozlaşdırırlar.
Siyahının ikinci pilləsində Ryan Goslinqin baş rolda çəkildiyi, “Amazon MGM” istehsalı olan "Project Endgame" elmi-fantastik filmi yer alıb. Nümayişinin beşinci həftə sonunda cəmi 15 faizlik minimal azalma yaşayan film 20,5 milyon dollar qazanıb. Planetlərarası dastandan bəhs edən bu filmin dünya üzrə ümumi gəliri artıq 573 milyon dolları ötüb, Şimali Amerikadakı yerli hasılatı isə 285,1 milyon dollara çatıb.
Yeni vizyona girən "Mumya" (The Mummy) qorxu filmi isə açılış həftəsonunda 13,5 milyon dollar gəlir əldə edərək ilk üçlüyə daxil olub. Warner Bros. və New Line tərəfindən ərsəyə gətirilən, prodüserləri Ceyson Blum və Ceyms Van olan filmin cəmi 22 milyon dollarlıq təvazökar büdcəsi var.
Analitiklər qeyd edirlər ki, başlanğıcın sadə olmasına baxmayaraq, film nümayiş müddətinin sonunda yaradıcıları üçün kifayət qədər mənfəət gətirə bilər.
film mədəniyyət serial