“Eurovision” artıq öz ənənəvi sərhədlərini aşır. Bu il tamaşaçılar tanış qaydalar əsasında, lakin yeni coğrafiya və daha böyük ambisiyalarla Asiya ölkələrini birləşdirən yeni format görəcək.
Lent.az xarici mediaya istinadla xəbər verir ki, Avropa Yayım Birliyi (EBU) yeni beynəlxalq müsabiqənin – Eurovision Song Contest Asia layihəsinin başladığını elan edib. Bu, brendin Avropadan kənara atdığı ilk bu qədər böyük addımdır.
Şounun finalı 2026-cı il noyabrın 14-nə planlaşdırılıb və Tailandın paytaxtı Banqkokda keçiriləcək. Bununla təşkilatçılar Asiya regionu üçün yeni musiqi cazibə mərkəzi yaratmağa çalışır.
Format yeni görünsə də, brend əvvəllər də qismən coğrafi sərhədləri aşmışdı. Məsələn, Avstraliya artıq bir neçə ildir klassik Eurovision müsabiqəsində iştirak edir.
Debüt müsabiqəsində bir sıra Asiya ölkələrinin iştirakı gözlənilir. Mart ayının sonuna olan məlumata görə iştirakını təsdiqləyən ölkələr bunlardır: Cənubi Koreya, Filippin, Tayland, Vyetnam, Malayziya, Kamboca, Laos, Banqladeş, Nepal və Butan.
Bununla belə, müsabiqənin konsepsiyası hələ tam təsdiqlənməyib. Müxtəlif illərdə təşkilatçılar 9-dan 15-ə qədər ölkənin iştirakı ilə fərqli formatları nəzərdən keçirib və layihə dəfələrlə təxirə salınıb, həmçinin keçirilmə yeri dəyişdirilib.
Əlavə maraq doğuran məqamlardan biri də Avstraliyanın mümkün qoşulmasıdır. Bu, eyni ölkənin müsabiqənin iki versiyasında paralel iştirakı kimi presedentsiz hal ola bilər.
Asiya debütə hazırlaşdığı vaxt, Avropa yubileyə hazırlaşır. May ayında Eurovision 2026-nın 70-ci müsabiqəsi keçiriləcək. Tədbir Vyanada baş tutacaq və şou Wiener Stadthalle arenasında təşkil olunacaq. Yarımfinallar mayın 12 və 14-də, böyük final isə mayın 16-da keçiriləcək.
Bu il iştirakını 35 ölkə təsdiqləyib ki, bu da son illərin ən aşağı göstəricilərindən biri sayılır. İştirak edən ölkələr arasında Ukrayna, Fransa, Almaniya, İtaliya, Böyük Britaniya, İsveç, Polşa, Serbiya, Avstraliya və İsrail var.
Qeyd edək ki, İspaniya, Niderland, İrlandiya, Sloveniya və İslandiya iştirakdan imtina edib. Bunun səbəblərindən biri İsrailin iştirakı ətrafında gedən müzakirələrdir. Bunun əvəzində Bolqarıstan, Rumıniya və Moldova müsabiqəyə geri qayıdır.
Eurovision artıq sadəcə musiqi şousu çərçivəsini aşaraq qlobal mədəni fenomenə çevrilib. 1956-cı ildə başladığı vaxtdan bəri bu müsabiqə hər il yüz milyonlarla tamaşaçı toplayır.
Bundan əlavə, İspaniya silahlı münaqişədə olan ölkələrin “Eurovision”da iştirakının məhdudlaşdırılması ilə bağlı müzakirələrin başlanmasını təklif edib. Xüsusilə Ukrayna və İsrail nəzərdə tutulur. Bu açıqlama 24 fevral 2026-cı ildə, Rusiyanın Ukraynaya genişmiqyaslı müdaxiləsinin dördüncü ildönümündə RTVE kanalında səsləndirilib.
“Eurovision” Eurovision Asiya