Dünyanın diqqəti Yaxın Şərqdəki müharibə və artıq “Qiyamət silahı” kimi təqdim edilən raketlər işə düşür.
Lent.az xarici mediaya istinadən xəbər verir ki, İranın İsrailə və Körfəz ölkələrində yerləşən ABŞ hərbi bazalarına 2 tonluq döyüş başlığı daşıyan “Xürrəmşəhr” raketi ilə zərbə endirməsi çoxlarını təəccübləndirib.
İranın İnqilab Keşikçiləri Korpusu müharibənin başlanmasından bəri həyata keçirilən “ən ağır və ən genişmiqyaslı hücum dalğası”nın təşkil edildiyini açıqlayıb. Üç saatdan çox davam edən hücumlar zamanı xüsusilə 2 tonluq döyüş başlığı daşıyan inkişaf etmiş “Xürrəmşəhr” tipli ağır ballistik raketlər başda olmaqla çoxsaylı raketlər ardıcıl və mərhələli şəkildə buraxılıb.
Tel-Əvivdə panika
İsrailin paytaxtı Tel-Əviv və ətraf ərazilərdə hava hücumu ilə bağlı həyəcan siqnalı səslənib, sakinlər gecəni sığınacaqlarda keçiriblər. İranın raketlərinin Hayla peyk rabitə mərkəzini, Beer Yaakov, Qərbi Qüds və Hayfadakı hərbi mövqeləri hədəf aldığı bildirilib. Hücumların hədəfləri arasında İraqın Ərbil şəhərindəki ABŞ obyektləri və Bəhreyndə yerləşən Beşinci Donanmanın bazası da olub.
Mehr xəbər agentliyinin məlumatına görə, hücumlar Həzrət Əlinin şəhid edilməsinin 1365-ci ildönümü zamanı həyata keçirilib.
Xürrəmşəhr – (Khorramshahr missile) raketi haqqında bəlli olanlar
Xürrəmşəhr raketi İranın ən ağır və uzaqmənzilli ballistik raketlərindən biri hesab olunur. Bu raket İranın raket proqramı çərçivəsində hazırlanıb və ilk dəfə 2017-ci ildə ictimaiyyətə təqdim edilib. Raket əsasən strateji hərbi hədəflərə qarşı istifadə üçün nəzərdə tutulur və böyük döyüş başlığı daşımaq qabiliyyəti ilə seçilir.
Məlumatlara görə, Xürrəmşəhr raketinin uçuş məsafəsi təxminən 2000 kilometrə qədərdir. Bu isə onun Yaxın Şərq regionunda yerləşən bir çox hədəfə çata bilməsi deməkdir. Raketin ən diqqət çəkən xüsusiyyətlərindən biri isə çox ağır döyüş başlığı daşıya bilməsidir. Məlumatlara görə, bu raket 1500–2000 kiloqrama qədər döyüş başlığı daşıya bilir.
Xürrəmşəhr raketi maye yanacaqla işləyir və mobil buraxılış qurğularından buraxılır. Bu xüsusiyyət raketin gizli şəkildə yerləşdirilməsini və sürətli şəkildə istifadəyə hazırlanmasını mümkün edir.
Raketin adının mənası nədir?
Raketin adı İranın cənub-qərbində yerləşən Xürrəmşəhr şəhərinin adından götürülüb. Bu şəhər İran–İraq müharibəsi zamanı ən ağır döyüşlərin baş verdiyi yerlərdən biri olub və İran üçün simvolik əhəmiyyət daşıyır.
Analitiklər hesab edir ki, Xürrəmşəhr raketi İranın strateji çəkindirici vasitələrindən biridir. Böyük döyüş başlığı və uzun mənzili sayəsində bu raket regionda hərbi balansın mühüm elementlərindən biri kimi qiymətləndirilir.
Son illərdə Yaxın Şərqdə gərginliyin artması fonunda İranın ballistik raket proqramı beynəlxalq diqqət mərkəzində qalır və bu tip raketlər region təhlükəsizliyi ilə bağlı müzakirələrdə tez-tez gündəmə gətirilir.
İranın istifadə etdiyi Xeybərşiken də eyni zamanda çox istifadə edilən raketlərdən biridir.
Xeybərşiken (Kheibar Shekan missile) raketi nədir?
Xeybərşiken (Hayberşiken) İran tərəfindən hazırlanmış orta mənzilli ballistik raketdir və ölkənin raket arsenalında ən yeni və diqqət çəkən silah sistemlərindən biri hesab olunur. Bu raket ilk dəfə 2022-ci ildə İranın İran İslam İnqilabı Keşikçiləri Korpusu tərəfindən ictimaiyyətə təqdim edilib.
Xeybərşiken raketi əsasən strateji hərbi hədəfləri vurmaq üçün nəzərdə tutulub və yüksək dəqiqlik, uzun məsafə və güclü döyüş başlığı ilə seçilir. İran rəsmiləri bu raketin regiondakı hərbi balansda mühüm rol oynadığını bildirirlər.
Texniki xüsusiyyətləri nə ilə fərlənir?
Məlumatlara görə, Xeybərşiken raketinin uçuş məsafəsi təxminən 1400–1500 kilometrdir. Bu məsafə raketin Yaxın Şərqdə yerləşən bir çox strateji hədəfə çatmasına imkan verir. Raket bərk yanacaqla işləyir və bu xüsusiyyət onun daha sürətli hazırlanaraq buraxılmasına şərait yaradır.
Ekspertlərin sözlərinə görə, raketin döyüş başlığı yüksək manevr qabiliyyətinə malikdir və bu xüsusiyyət hava hücumundan müdafiə sistemlərindən yayınma ehtimalını artırır. Raket həmçinin mobil buraxılış qurğularından istifadə edilərək atılır və bu da onun aşkarlanmasını çətinləşdirir.
Raketin adının mənası nədir?
Raketin adı İslam tarixində mühüm hadisə hesab edilən Xeybər döyüşü ilə əlaqələndirilir. İran bu adı simvolik olaraq seçdiyini bildirir və raketin gücünü vurğulamaq üçün istifadə edir.
Analitiklər hesab edir ki, Xeybərşiken raketi İranın ballistik raket proqramının ən mühüm elementlərindən biridir. Bu raket ölkənin hərbi strategiyasında çəkindirici vasitə kimi təqdim olunur.
Son illərdə regionda artan gərginlik fonunda İranın raket proqramı beynəlxalq diqqət mərkəzində qalmaqda davam edir və bir çox ölkələr bu silahların təhlükəsizlik balansına təsir göstərə biləcəyini bildirir.
Xeybərşiken raketi, İran raket proqramı, ballistik raketlər, İran ordusu, IRGC, hərbi texnologiya, Yaxın Şərq təhlükəsizliyi, raket silahları
İsrail-İran müharibəsi ABŞ-İran müharibəsi İran İsrail ABŞ Yaxın Şərq müharibəsi Xürrəmşəhr raketi ballistik raketlər Tel-Əviv Livan Hizbullah İnqilab Keşikçiləri Körfəz ölkələri hərbi hücumlar
