Polşada yerləşən məşhur Modlin qalasının bərpası çərçivəsində Avropanın ən uzun binasında yeni otelin açılması planlaşdırılır. Layihə tarixi kompleksin memarlıq görünüşünü qorumaqla həyata keçiriləcək.
Lent.az xarici mediaya istinadla xəbər verir ki, otel XIX əsrdə inşa edilmiş və uzunluğu 2 kilometrdən artıq olan keçmiş hərbi kazarmalarda fəaliyyət göstərəcək.
Kompleksin üstünlüklərindən biri də onun Varşava-Modlin hava limanının yaxınlığında yerləşməsidir. Layihəyə əsasən, Qırmızı Qüllə ilə qala muzeyi arasında yerləşən uzun illər istifadəsiz qalmış kazarma hissəsi bərpa olunacaq. Restavrasiya zamanı tarixi binanın orijinal memarlıq üslubu maksimum dərəcədə qorunacaq.
İlk mərhələdə oteldə 123 nömrə istifadəyə veriləcək. Gələcəkdə isə otaqların sayının 250-yə çatdırılması planlaşdırılır. Üçulduzlu otel əsasən turistlərə, hava limanının sərnişinlərinə və işgüzar səfərə gələn qonaqlara xidmət göstərəcək.
Kompleksdə həmçinin restoran, lobbi-bar, açıq terraslı istirahət zonası və iki konfrans zalı fəaliyyət göstərəcək. Ən böyük konfrans zalı təxminən 250 kvadratmetrlik tədbirlərə ev sahibliyi edə biləcək.
Layihənin diqqətçəkən hissələrindən biri tarixi Kadet qapılarının bərpasıdır. Bu hissə gələcəkdə otelin əsas lobbisinə çevriləcək. Memarlar bildirirlər ki, bütün işlər mədəni irsin qorunması tələblərinə uyğun şəkildə aparılacaq.
Modlin qalası nə ilə məşhurdur?Modlin qalasının kazarmaları Avropanın ən uzun binası hesab olunur. Uzunluğu 2 kilometri ötən bu tikili XIX əsrdə təxminən 20 min əsgərin yerləşdirilməsi üçün inşa edilmişdi. Tarixi qala 2026-cı ildə yaradılmasının 220 illiyini qeyd edir.
Avropa Polşa Modlin qalasıMənbə: lent.az